Jan Krielskool
Jan Krielskool is een van die instansies waarvoor NG Kerk Gansbaai 'n geldelike bydrae gee.
Boodskap van Jan Krielskool
Baie dankie dat u vanoggend by die deure bydra tot die Here se werk by Jan Krielskool.
Jan Krielskool (sedert 1937) is die 3de oudste skool vir “kinders met spesiale onderwysbehoeftes”.
Die “ekstra” dienste wat die staat en ouers nie kan bekostig nie, word deur gemeentes en individuele donateursvriende gedra. Dit beloop etlike miljoene per jaar, maar die resultate toon dat dit deur en deur die moeite werd is.
Jan Krielskool is bekroon as die beste “spesiale” skool in Suid Afrika en is die enigste spesiale skool waar leerders met gestremdhede matriek in Afrikaans kan slaag. Hulle skryf ook dieselfde matriek eindeksamen as kinders in hoofstroom skole.
2021 se Matrieks spog met ʼn 98,6% slaagsyfer! En dis nie al nie. Die gesamentlike slaagsyfer vir al die leerders van Graad R tot Graad 11 is 96.6%. Voorwaar ʼn uitsonderlike prestasie vir enige skool. Soveel te meer vir kinders met leergestremdhede!
In 2022 ondersteun Jan Krielskool leerders met die volgende leergestremdhede:
• Spesifieke leergestremdheid - 319
• Outistiese spektrum versteuring - 73
• Hoor gestremdheid - 40
• Mediese toestand - 19
• Fisies gestremd - 2
• Epilepsie - 10
• Serebrale gestremdheid - 13
• ADHD / ADD - 12
• Swaksiende - 5
• Ernstige angsversteurings - 4
Aantal leerders in 2022: 519
Laerskool: 165
Hoërskool 354
Jan Krielskool neem leerders uit hoofstroomskole wat, na evaluasie deur die Wes-Kaapse Onderwys Departement (WKOD) na ons verwys word.
Sommige leerders word ook uit ander spesiale skole na Jan Krielskool oorgeplaas. Vanuit Carel du Toit-skool en Tygerberg Hospitaal-skool word leerders met gehoorgestremdhede en ander struikelblokke tot leer geakkommodeer. Sommige spesiale skole soos Paarl-skool en Astra-skool in Kaapstad neem leerders net tot graad 9. Heelwat van hierdie leerders het ook fisiese gestremdhede. Hierdie jaar kon Jan Kriel 30 leerders uit hierdie skole akkommodeer en hul die kans gee om Matriek te verwerf!
Kom leef ons leuse en gee ʼn kind ʼn kans!
