Baardskeerdersbos Eeufees
Die NG Kerkgebou te Baardskeerdersbos, deel van die NG Gemeente Gansbaai, betree hierdie jaar haar honderdste bestaansjaar. Ter viering hiervan, met groot dankbaarheid vir 100 jaar van Genade, bied die Baardskeerdersbos Streek ‘n Feesnaweek op 28 en 29 Mei 2022 aan.
Die bestuur van B/Bos Plaasmark het ingestem dat die Feesvieringe mbt Saterdag 28 Mei 2022 deel kan vorm van die bestaande Plaasmark-aanbieding. ‘n Verskeidenheid tafels/stalletjies met tradisionele basaar items sal addisioneel tot die bestaande stalletjies deur die Baardskeerdersbos Streek asook die Plaasbediening van die NG Gemeente Gansbaai bedryf word.
Ten einde waarde vir die besoeker toe te voeg sal die Rummi Cup Orkes en Eddie Barnard, “One Man Band” van Franskraal tydens die Fees optree.
‘n Uitstalling van geskiedkundige memoribillia en foto’s sal, ten tyde van begeleide toere deur Baardskeerdersbos, in die kerkgebou besigtig kan word.
‘n Veiling van onder andere antieke items, ens word aangebied en vir die kinders sal daar ‘n interaktiewe troetelwerf wees.
Sondag 29 Mei 2022 se verrigtinge begin by die begraafplaas met kransleggings, kooroptredes, samesang ens. En direk daarna word ‘n Feesdiens in die Kerkgebou gehou. Ook hier sal verskeie kore optree. Na afloop van die diens gaan daar gesellig saam gekuier word op die kerkterrein.
