Oudste lid steeds aktief op land en see

Die klubbestuurder van Overberg Hengelklub, Gert du Plessis, het Dinsdag, 9 Augustus 2016,  sy 78ste verjaardag gevier.

Dit maak van die geliefde lid, die oudste  en mees gerespekteerde klublid.

Gert was “Ge-tie en ge-collar” vir die openingsaand van die klub se Kleinbaai Interprovinsiale Bodemvis Kompetisie.

Dit is die vyfde keer dat die klub die gesogte kompetisie aanbied.

Oom Gert is ‘n gesoute skiboot hengelaar.  Hy het reeds in 1976 in Krugersdorp sy Transvaalkleure verwerf toe hy verbonde was aan die Wahoo Skiboot Klub.

In 1992 verwerf hy sy SA diepseehengel kleure (SADSAA) en in 1998 verruil hy en sy vrou Miempie, Gauteng vir die Overstrand en kom vestig hulle permanent in Gansbaai.

Oom Gert wat al 18 jaar lid is van die klub, het ook vyf jaar as voorsitter gedien.

Hy geniet steeds sy hengeluitstappies en is ook baie bedrywig as klubbestuurder.

Miempie vertel dat hy maar sy visse kan huis toe bring.  Sy maak dit net nie skoon nie, maar is ‘n bedrewe viskoekiebakster.

Miempie is ook ‘n ywerige VLV-lid in die dorp.

Overberg Hengelklub se oudste lid, Gert du Plessis, het Dinsdagaand sy 78ste verjaardag gevier.  By hom sit sy wederhelf, Miempie.
Gansbaai_Courant