Overberg Bootklub het vir die vyfde agtereenvolgende jaar ‘n uiters suksesvolle hengeltoernooi aangebied. Die weer was gunstig, dog rof op die diepsee en die vangste was uitstekend.
Die Kleinbaai Interprovinsiale Bodemvishengeltoernooi (KIB) waaraan agt spanne meegeding het, het soggens om 07:00 begin en lyne op was 16:00.
OP het die eerste posisie ingeneem met 649 punte, WP Blou tweede met 596 punte, gevolg deur Suidwestelike Distrikte met 582 punte.
Die spesiewenners was Amanda van Staden (blouhotnotsvis), Morné Marais (stokvis, silwervis en hotnotsvis), Carla Rautman (rooi roman), Ian Viljoen (rooi stompneus) Hanno Terblanché (geelbek), Martin Giers (kabeljou), MC Scholtz (snoek) en Ronald Penninkhof (rooi steenbras).
Martin Giers, Peter Dawson en Sheena Gerber was die drie top hengelaars.
Skipper Louis Becker met sy boot S-Catman het ‘n goue medalje ingepalm, met Mark Truter van Cavalier, silwer en Colin Joubert brons.
Die bestuur van OBK is dankbaar vir elke deelnemer en borg aan hierdie gesogte toernooi en sien uit na volgende jaar.
