‘n Galjoen van 4,1kg het Freddie Booysen van Franskraal verlede week behoorlik laat sweet toe hy die mooi vis vanaf die rotse gehaak het. Freddie het alleen gaan visvang, want dit is wat die afgetrede sakeman deesdae doen, toe hy voel hy het ‘n knewel aan die lyn. Hy het ‘n vriend gebel, wat nie kon kom help nie.
Ná ‘n oproep na sy vrou, Truda was hulp oppad. Sy moes egter eers die gaffel in die hande kry wat hoog in die motorhuis gepak was. Met ‘n gesukkel oor die rotse het Truda uiteindelik by die vis uitgekom en hom sommer met haar hande gegryp – gaffel eenkant. Freddie is baie trots op hierdie pragtige vangs. Die feit dat hy baie onlangs ‘n knie-operasie ondergaan het en glad nie op die rotse hoort nie, is ongedaan gemaak met hierdie bielie van ‘n galjoen.
