Die Wêreld Stoeikampioenskappe wat vanjaar in Georgia aangebied word, wag vir Johan Hulme (16), ‘n jong kadetstoeier van Worcester.
Die toernooi vind vanaf 10 tot 20 September vanjaar in Tbilisi, hoofstad van Georgia plaas, met Georgia wat as gasheerland optree.
Johan is die kleinseun van ‘n trotse Johan en Elcine Hulme, bekende en jarelange inwoners van Franskraal.
“Johan het as ‘n graad 3 leerder begin stoei, maar was so klein gebou dat ons nie veel hoop vir hom gehad het nie,” vertel Elcine, “maar aan die einde van daardie jaar het hy sommer drie bekers ingepalm, waarvan die een vir die Beste Opkomende Kadetstoeier was.”
Johan is tans ‘n Graad 11 leerder aan Drosdy Hoërskool in Worcester.
Hy het aanvanklik by Brackenfell Stoeiklub aangesluit, maar is sowat vier jaar gelede na Drosdy Stoeiklub, waar sy afrigter Kurt Herzog is.
Daar het hy as ‘n mannetjie van o/42kg begin, maar stoei vandag in die o/69kg gewigsklas.
Gedurende April vanjaar het Johan ‘n derde plek tydens die Suid-Afrikaanse Proewe verower en is vir die Afrika Kontinentale Kadet Kampioenskappe gekeur.
Vanaf 13 tot 27 Julie vanjaar is hy saam met nog stoeiers en sy afrigter Kurt Herzog na Algiers, hoofstad van Algerië.
Daar het Johan derde geëindig en ‘n bronsmedalje ontvang. Volgens sy afrigter het hy ‘n silwermedalje net-net gemis.
Die drie stoei-kategorië is Vrystyl, Grieks/Romeinse en Dames. Johan stoei in die Grieks/Romeinse kategorie.
Drie stoeiers is uit elk van die drie kategorië gekies om in Algerië agter te bly vir ‘n oefenkamp. Sy afrigter het hom deurentyd tydens die Olimpiese Solidariteit Oefenkamp bygestaan. Johan het waardevolle ondervinding opgedoen.
Nou wag die Wêreld-kampioenskappe op hom en sy ouers en sy Franskraal-grootouers hou al hulle duime styf was.
