Gansbaai Fotografieklub se lede was die ene ore (en vrae) tydens Robert Johnson se aanbieding van Makro- (Macro) - en naby (Close-up) foto’s.
Hy het ‘n insiggewende en prakties-georiënteerde aanbieding gelewer, waar elke lid die geleentheid ontvang het om sy inligting prakties toe te pas.
“Die verskil tussen ‘close-up’ en ‘macro’ foto’s is dat ‘close-up’s net naby-foto’s is, terwyl ‘macro’s’ baie klein en intensief is waar daar direk op die voorwerp ingezoem word,” het hy gesê. “Enige kamera, selfs ‘n mik-en-druk, kan vir ‘macro’ foto’s gebruik word.”
Robert het in 1994 ‘n strandhuis in Franskraal gekoop en woon sedert 2014 permanent daar.
Tot en met sy aftrede hier, was hy mede-eienaar van Join Photography.
Hy hanteer nog soms troues en fotosessies met modelle, maar andersins is hy rustig ná sy aftrede en geniet net sy kamera.
“Ek het tien jaar gelede by Tygerberg Fotografie Vereniging betrokke geraak, waar ek vir sewe jaar as voorsitter gedien het en dit is daar waar ek toegelaat het dat fotografie my heel ‘ingesluk’ het,” vertel hy.
Twee genres wat Robert se gunsteling-afdelings is, is Landskappe en “Table Top” stillewe fotografie.
Nog ‘n passie vir hom is om sinvolle AV’s (foto’s met klank wat ‘n storie vertel) te maak.
Robert is een van die eerste twaalf nasionaal gekwalifiseerde fotobeoordelaars en het reeds talle nasionale fotokompetisies beoordeel.
Hy is ook die houer van ’n LPSSA-toekenning (Lisensiaat in Fotografie).
Gansbaai Fotografieklub se byeenkomste vind op die eerste en derde Maandag van die maand om 18:30 by Groeneweide Kwekery plaas. Opleiding in Straatfotografie sal tydens die byeenkoms van 19 September 2016 verskaf word. Vir navrae kan Riaan Jacobs by 082-373-8270 gekontak word, of skakel vir Veronica du Plessis by 084-826-8781.
Webtuiste is www.gbpc.co.za.