Drie gimnasiuminstrukteurs van Gansbaai het verlede Saterdag aan ‘n nasionale liggaamsbou kompetisie in Kampsbaai deelgeneem.
Pieta Botes (28), Cobus Briedenhann (38) en Nicola Immelman (29) vertel dat hierdie deelname sonder twyfel die hoogtepunt van hulle jaar is.
Die kompetisie word aangebied deur die “National Amateur Body Building Association/World Fitness Federation” (NABBA/WFF).
Dit was die eerste keer dat hulle as die “Health and Active” span inskryf vir ‘n kompetisie.
Slegs vanuit die Wes-Kaap was daar sowat tagtig deelnemers wat in die agt en twintig kategorieë deelgeneem het.
Cobus het vir die Mens Classic Body Building Class 1 over 1.79 meter ingeskryf en vierde geëindig.
Hy is gekeur om aan die Suid-Afrikaanse Nasionale kompetisie deel te neem wat op 8 Oktober 2016 in Pretoria plaasvind.
Pieta het in die Novice Body Building-afdeling deelgeneem, wat vir deelnemers bedoel is wat die eerste keer inskryf.
Hy het net-net buite die vereiste eerste ses plekke geëindig.
Nicola het op haar beurt vir die Beach Bikini over 1.63 meter ingeskryf en ‘n vierde plek behaal. Slegs die eerste drie deelnemers dring deur na die Suid-Afrikaanse Nasionale kompetisie.
NABBA is die eerste kompeterende liggaamsbou organisasie wat in 1950 gestig is. Hulle bied ook die Mr Universe kompetisie aan. Die eerste Mr. Universe wat gekies is, was Steve Reeves wat daarna meer as dertig Hercules films vervaardig het.
“Ons vertrou dat ons deelname aan hierdie kompetisie die eerste van vele sal wees waartydens ons ons dorp en ons provinsie sal gaan verteenwoordig,” het Pieta gesê.
