Oktobermaand is ingewy met strawwe kompetisie tussen Birkenhead (BBK), Overberg (OBK) en Walkerbaai (WBK) hengelklubs.
Die gesogte, jaarlikse King of the Bay Boothengelkompetisie is Saterdag, 1 Oktober 2016 aangebied.
Die gasheerklub, Birkenhead kon Saterdagaand ‘n naelskraapoorwining vier.
Hengelaars ding veral mee om die gesogte King of the Bay wisseltrofee in te palm, maar die aanloklike pryse wat gewen kan word, lok beslis die hengelaars vroegoggend see toe.
Die uitslae is soos volg:
Die gemiddeld van bootmassas van die drie klubs het die wenners bepaal: Eerste BBK met 5.68kg; tweede OBK met 5.3425kg; derde WBK met 4.7kg - met naelbyt verskille in kilogram.
Die drie klubs het elk vier bote ingeweeg, wat die onderlinge kompetisie dus redelik gelykop laat plaasvind het.
Individuele uitslae is soos volg: Swaarste vis (BBK) - JP Uys (geelbek 5.45kg); tweede swaarste vis (BBK) - Danie Fourie (geelbek 5.05kg); swaarste sak (BBK) - Hennie Groenewald (14.40); tweede swaarste sak (BBK) - JP Uys (13.65kg); swaarste boot (BBK) - Ben Uys op Oupa (13.60kg); tweede swaarste boot (OBK) - Mark Truter op Cavalier (8.72kg); Junior swaarste sak (BBK) - Hennie Groenewald (14.49kg).
“Die eerste skuitdag ná ‘n paar dae van sterk water en Noordweste winde het soos verwag, goeie geelbek vangste opgelewer en dit was goed om die manne met groot glimlagte en ‘n geskerts skaal toe te sien stap,” het Philip Fourie, voorsitter van die Birkenhead Boothengelklub gesê.
Wisseltrofee oorsprong:
Die Bestuur van die Birkenhead Bootklub het vroeg in 2014 besluit om jaarliks ‘n ‘King of the Bay’ Boothengelkompetisie aan te bied.
Die gedagte was om ‘n prestige wisseltrofee te ontwerp en dat die drie bootklubs rondom Walkerbaai jaarliks om die trofee moet wedywer, maar ook vir onderlinge samesyn.
Philip en Lorraine Fourie is deur die Cape Horn gedenkteken se ontwerp, wat ‘n Albatros uitbeeld, geïnspireer. Daar is toe besluit om ‘n trofee wat ‘n Malgas (Gannet) vertoon, te ontwerp en as Wisseltrofee vir die King of the Bay Boothengelkompetisie beskikbaar te stel.
