Gansbaai Posduifklub se Norman Stevens (jnr) het behoorlik skoonskip gemaak onder deelnemers met sy totale aantal punte van 753 in sy eerste vliegjaar vir die klub.
Norman, bestuurder van Gansbaai Karavaanpark, is as Gansbaai Posduifklub se 2016 kampioen gekroon, met Corinne Swart as die 2016 dameskampioen.
Naas die 40 uit 102 sertifikate wat Norman ingepalm het, het hy ook die volgende trofeë verower: Kortpadkampioen; Middelpadkampioen; Langpadkampioen; Jongduifkampioen; Beste henduif; Beste mannetjiesduif; Beste duif in geheel vir 2016.
Norman Stevens (snr) het die trofee vir die beste jongduif van 2016 verower.
Selfs met die Overberg Posduif Unie (OPU) het Norman (jnr) algeheel tiende geëindig, en is hy ook deur hulle bekroon vir die mannetjiesduif met die meeste punte in die unie. Hy wen ook die Britstown Unie-wedvlug.
Van die 36 wedvlugte gedurende 2016, is net twee nie gevlieg nie. Daarvoor is 102 sertifikate vir die eerste, tweede en derde plekke uitgereik, wat soos volg ingepalm is: Norman Stevens (jnr) 40, Louis-Johannes Groenewald 21, Hilton Hitge 20, Norman Stevens (snr) 11, Leonard Ashalin 8 en Corinne Swart en Hennie Botha elk een.
Norman sê hy het vir meer as 20 jaar by sy pa geleer hoe om met posduiwe te werk en te vlieg.
‘n Goeie vriend, Danie Smit het in 2015 verhuis. Nadat die jong Norman hom met sy trek gehelp het, het hy sy hok met sowat 30 duiwe aan hom geskenk, waarmee eersgenoemde verder geteel het.
Met dié duiwe het Norman (jnr) in 2016 begin vlieg en tot almal se verbasing “vere” in al die klublede se oë laat wapper.
