Vanjaar gebeur dit die twaalfde keer...
Soms was daar storms, soms lekkerrrr weer!
Jaarliks word harder probeer en gebruik ons die lesse algaande geleer.
Voorspoed jaag die Kersmark soos ‘n brander:
Om voor te bly, word dinge gedurig verander. Soms is verandering goed en skrander, maar o wee, soms moet ons net lag vir elkander! Dis die basiese dinge wat sake reg laat ontvou . . . en dan word gepoog om met nuwe dinge uit te bou.
Die Kersmark word gewoonlik aangeprys . . . soms afgeknou, maar deur geloof in Hom en gebed in stand gehou!
Die doel is om ons gemeente te help befonds –
maandelikse bydraes raak mos moeilik soms.
Nou laat die Kersmark harte beter bons,
want daar word spandeer . . . sonder ‘n frons!
Mag u hierdie Kersmark geniet!
Ons bid dat Hy sy seën daaroor giet.
Kom ons sing in ons harte ‘n dankie-lied –
in dié wete dat sy wil geskied!
- Thys en Linda Cilliers
Linda Cilliers vertel:
“Verandering is ‘n onveranderlike feit van die lewe” (Rosa Guy). Sedert die eerste Kersmark in 2004, het daar oor die jare ‘n paar veranderings plaasgevind. Vanaf 2005 het ons ‘n gerekenariseerde datastelsel in gebruik geneem, wat voorraad beheer en die druk van prysplakkers en uitbetalings aan die uitstallers baie vergemaklik het. Die Kersmark-kantoor op die galery het ‘n groot verandering teweeg gebring en ‘n verskil gemaak in die hantering van die administrasie van die hele projek.
My regterhand, Maryke van Rensburg, en die staatmaker vloerbestuurders, Petro Trautman, Rita Pio en Ilse Klopper, is saam met my deurlopend betrokke, d.w.s. gedurende die 10 maande wat die Kersmark voorafgaan. Daar is ‘n paar uitstallers wat sedert die eerste Kersmark nog steeds jaarliks gekeur word vir deelname omdat hulle met godgegewe talent jaarliks veranderings maak en nuwe produkte voorsien. Dit, uiteraard, bring mee dat die Kersmarkuitstallings elke jaar anders lyk, tesame met nuwe uitstallers wat ook jaarliks aan die Kersmark ‘n ander gesig gee. Die talent-volle Anita Botha en haar span verander ook elke jaar die dekor in die saal en maak dit vir ieder en elk wat die Kersmark ondersteun ‘n aangename ondervinding.
Gedurende die eerste twee jaar was daar buite die saal ‘n groot tent opgeslaan vir die kafeteria, maar die wind het dit te onaagenaam gemaak. Die kafeteria wat na die verhoog verskuif is, was ‘n waagstuk wat verandering betref, maar dit het ‘n baie gesellige kuierplek geword, wat bydra tot die lekker atmosfeer van die hele Kersmark.
Diegene wat sedert 2004 jaarliks by die Kersmark betrokke was, is almal ongeveer 12 jaar ouer en die verandering wat ek die graagste wil sien, is die betrokkenheid van die jonger gemeente-lede by die Kersmark, want dit is ‘n gemeenteprojek waar oud en jonk lekker kan saamwerk. Dis ‘n voldonge feit dat dit opoffering verg om twee weke lank gedurende die Desembervakansie vrywillig by ons gemeente se Kersmark te werk.
Carl Jung (1875 – 1961) se woorde is baie waar: “Jy kan nie jou situasie of die mense rondom jou verander nie. Net jou eie gesindheid.” In Handelinge lees ons dat verandering geskied deur God se Gees in ons. Na alles bly ons Hemelse Vader die enigste
onveranderlike in ons lewens en in konteks wat die Kersmark betref, seën Hy ons gemeente jaar na jaar.
Ek wil afsluit met die gebed van St.Franciskus van Assisi:
“God grant me the serenity to accept the things I cannot change, the courage to change the things I can and the wisdom to know the difference. Amen.”
