Gemeentestruktuur: Gansbaai-gemeente is ‘n groot korporatiewe gemeente wat in sewe streke ingedeel is met vyf kommissies met eiesoortige bedieninge en diensgroepe.
Volgens die kerklike statistiek van 2015 bestaan die gemeente tans uit ongeveer 2 130 belydende lidmate en 279 dooplidmate. Met die aftrede van dr. Bobo van Zyl is die kerkraad genoodsaak om te besin oor die gemeente se pad vorentoe.
Gedurende die afgelope jaar het die Kommissie Gemeentebou reeds gedagtes laat gaan ten opsigte van die gemeentestruktuur en ook die bedieningstruktuur. Daar is besin oor hulpbronne en hoe dit ten beste aangewend kan word om die kerkraad en verskillende bedieninge en kommissies se werksaamhede te laat vloei en nie te laat oorvleuel nie. Die kerkraad het reeds besluit om in die nuwe jaar opnuut te kyk na die samestelling van die verskillende kommissies en ook die samestelling van die kerkraad (die beskikbaarheid van ouderlinge en diakens is veral ‘n groot bekommernis, want dit raak lidmate in die wyke). Geen besluit is nog geneem nie. Hierdie saak sal DV in 2016 aandag geniet sodra ‘n nuwe leraar aangestel is.
