Vir ewig sal bly
In die Heildelbergse Kategismus vind ons die vraag: “Wat glo jy van die Heilige Algemene Christelike Kerk?” Die antwoord is: “Dat die Seun van God uit die hele menslike geslag vir hom ‘n gemeente wat tot die Ewige lewe uitverkies is, deur sy Gees en sy Woord in die eenheid van die ware geloof van die begin van die wêreld af tot die einde toe vergader, beskerm en onderhou en dat ek daarvan ‘n lewende lid is en ewig sal bly.”.
Die Kategismus word nog altyd gekenmerk deur die intieme “ek” en “ons” taal. Ek kan dus nie oor die Kerk dink as iets los van myself nie. Ek is in hierdie liggaam in gedoop, dit is deel van my identiteit. Gelowig-wees is per se kerk-wees. Maar ek is ook nie deel van iets wat op die laatste deur menslike energie instandgehou word nie, maar wat deur God geskep is en bewaar word. In ‘n wêreld waar ons geneig is om net op die individu te fokus mis ons maklik die gemeenskapskarakter van ons geloof. Ons mag nie vergeet dat ons altyd behoort nie.
