Ons word uitgenooi om dinge saam vas te hou wat ons soms voel mekaar weerspreek. Die Paasmisterie is vol paradoks. Jy moet sterf om die lewe in oorvloed te hê. Liefde is mag. Kobus Neethling in sy boekie “Dink soos Jesus” beskryf dit as: “Die paradoks vra van ons om ons denke onderstebo te gooi en uit ‘n ander hoek na ‘n situasie te kyk.” Hierin lê groot ontdekkings oor onsself en God. Jesus het immers so gepraat: “Wie sy lewe behou sal dit verloor, en wie sy lewe ter wille van My verloor, sal dit vind” (Matt 10: 39); “Maar baie wat eerste is sal laaste wees, en wat laaste is eerste.” (Matt 19:30). Paulus herinner ook in 1 Korinthiers dat die wysheid van God dwaasheid vir die wêreld is. Miskien is die groot uitnodiging in so praat, dat ons nie altyd so oortuig en seker hoef te wees oor alles nie, maar dat dit juis in ons onsekerheid en weerloosheid is, in ons “laat gaan” waar ons die diepte van God se liefde verstaan en ons lewe vind.
