Hoe gemaak met ons jongmense?
Die kerkraad het onlangs besluit dat ons in 2019 gaan fokus op die Jeug en ons gesinne. Ons het tot die oortuiging gekom dat ons nie oor die toekoms van die kerk kan dink sonder om te dink oor die plek wat ons jongmense en gesinne in ons gemeente inneem.
Ons is almal eens dat die kerk van môre aan ons jonger generasies gaan behoort, maar hoe bepaal dit vandag ons denke en ons optrede? Van Maandag tot Vrydag hoor ons die vrolike stemme van die groot menigte kinders langs ons kerk, maar tog raak daardie stemme al stiller hoe nader ons aan Sondag kom. Ek kan nie anders as om te dink aan Jesus wat in Lukas 18 sê: "Laat die kindertjies na My toe kom en moet hulle nie verhinder nie”
Op die afgelope Sinodesitting het ons van ongelooflike kreatiewe maniere gehoor waardeur gemeentes vir jongmense ruimte skep binne die kerk en dit het my laat wonder hoe tuis kinders en jong gesinne in ons gemeente voel?
In die tyd wat ons op ons jeug en gesinne wil fokus, nooi ons julle as gemeente uit om saam te vra hoe die kerk van môre, vandag se kerk, deur ons beleef? Dalk moet ons selfs vra hoe die kerk lyk wat jongmense in elkeen van ons sê optrede ervaar?
Mag 2019 die begin wees van ‘’n fase waarin ons proaktief ruimtes sal skep vir ons jonger generasies en mag ons seker maak dat daar waar ons ‘’n bank met een van hul deel, of hul nou 10 of 35 is, dat hul Jesus se uitnodiging in ons oë, woorde en optrede beleef.