Gebed tydens die afsondering
Here, Drie-Enig, as ons bid
kan ons net by een plek begin en dit is U
want wat U is, vra ons U om vandag en môre en oormôre vir ons te wees:
Skepper, wat getrou is aan dit wat U intiem gevorm het soos ‘n pottebakker klei,
Wewer, wat ons aanmekaargeweef het in die skoot van ons moeder,
Trooster wat ons bemoedig met U stok en staf in die dal van doodskaduwee,
Groen Sipres onder wie ons skuil, met ons rug teen U, veilig en gewortel
Moederhen wat ons roep en wie se vlerke plek het vir almal,
ons weg, ons begin en einde, die een wat saamstap en dra,
ons ma, wat raaksien wat diep in ons harte aangaan,
ons herder en gasheer wat vir ons genoegsaam is,
die balsem wat ons heel maak, liggaam en siel,
ons verlosser wat ons herinner dat die bose, sonde en dood nie die laaste sê het nie maar net die liefde,
wysheid wat ons in die tye van onsekerheid leer sif wat om te lees en wat om nie te lees nie, wie om na te luister en wie om voor doof te wees;
ons vriend wat sy lewe afgelê het sodat ons nou reeds die ewige lewe het wat oorspoel in ons lewens,
wees U wat meer is nog as dit ons genadig en seen ons dorp, land, kontinent, aarde en heelal tot U eer, AMEN