21 Dae 21 Psalms: Dag 12
1. Psalm 46:1 “God is vir ons ‘n toevlug en ‘n beskerming”.
“Doodle” die sin. Dit beteken vat ‘n potlood en laat die sin gebeur op papier.
2. Dank God vir 5 dinge in jou lewe.
3. Lees Psalm 46 drie keer hard deur.
4. Die wêreldbeeld van die mens van die Ou Testament help ons om die Psalm te verstaan. Hulle was diep bewus van die chaosmagte wat hulle omring (bv water). Die hele aarde word as te ware in plek gehou deur God. Hulle het ook geglo daar is baie gode, maar God is die een wat in beheer is van alles. Hy is ook die God van die nasies. God gebruik nasies en skepping vir sy doel. So nie die chaos of militere mag van ander is ooit buite sy mag nie. In die Psalm kan die hoorder rus in die wete, te midde van gedruis van die see en geraas van die ander nasies. In 2020 is daar ander dinge wat ons bang maak. Wat is dit vir jou?
5. Vers 11a (Bedaar en erken dat ek God is) word baie gebruik in die geloofstaal rondom stilte en wag in die teenwoordigheid van die Here. Ons kry verskillende vertalings: ‘Be still, and know that I am God!” (NRSV); “Laat staan en weet dat Ek God is” (53 vert). Wat hoor jy? ‘n Opdrag, uitnodiging, troos?
6. Ons bely: “Ek glo in God die Vader, die Almagtige, die skepper van die hemel en die aarde”. Die Griekse woord agter “Almagtig” is “Pantokrator”. Ek het nog altyd die woord bo ons vertaling verkies. Die fokus is dan nie op God wat alles kan doen en daarom moet nie (Almagtig) maar op God wat heerser is oor alles (Panta =alles, krato= heerser). Die fokus is op God wat alles in sy hande hou en met ons oppad is na iets wat groter is as wat ons verstaan. Dit herinner ons aan God se misterie, eerder as ‘n God wat doen wat ons dink gedoen moet word nie (soos ons soms aan Almagtig dink).
7. Lees weer vers 11 met die inligting by punt 6 in jou gedagte.
8. Sing/neurie vir jouself Liedboek 519: “Wees stil en weet: Ek is die Heer/Ek spreek, en wind en golwe bedaar/Ek sal ook jou getrou bewaar.”
