Plaaslike talentkompetisie wink

Gansbaai Biblioteek beplan ‘n opwindende Gansbaai Talentkompetisie vir die tweede helfte van 2017.

Edna van der Linde van Gansbaai Biblioteek sê Provinsiale Biblioteekdienste moedig biblioteekpersoneel gereeld aan om uitreikingswerk te doen.

Venda de Jager van Kleinmond Biblioteek het haar genader oor ‘n talentkompetisie in Gansbaai.

“Met Venda as voorbeeld, het ons besluit om die geleentheid met altwee hande aan te gryp,” het Edna gesê.

“Ons weet dat Gansbaai oorloop van rou talent en ons het die gedagte as ‘n wonderlike geleentheid gesien.”

Edna het onlangs ‘n werksessie gereël, met die doel om ‘n voorlopige komitee saam te stel. Drie plaaslike kunstenaars vanuit verskillende kategorieë was teenwoordig: Annelie Botha van Deo Gloria Sangskool, Lynette van Wyk van Dance Variation Co. Ministries en Marjaan van Tonder, ‘n plaaslike pianis.

Hierdie kunstenaars beskik gesamentlik oor meer as honderd jaar se ondervinding – vanaf dans en sang tot by instrumentale musiek.

Die voorlopige komitee wil so gou as moontlik al die nodige grondwerk doen om slaggereed te wees vir Gansbaai se eerste talentkompetisie in 2017.

“Ons nooi dus alle belangstellendes uit om in te skakel,” sê Edna.

Belangstellendes kan Edna van der Linde by Gansbaai Biblioteek skakel by 028-384-8346, of stuur ‘n e-pos na sgeldenhuys@over strand.gov.za.

‘n Voorlopige komitee is met die inisiatief van Gansbaai Biblioteek saamgestel met die oog op ‘n talentkompetisie wat volgende jaar in die dorp gehou sal word.  Van links Marjaan van Tonder,  Lynette van Wyk, Annelie Botha, Venda de Jager en Edna van der Linde.
Gansbaai_Courant_New