Insiggewende Fynbos Ekspo’s deur Whale Coast Conservation (WCC) is onderskeidelik by Laerskool Gansbaai en Gansbaai Primêr aangebied en vorm deel van WCC se Jeug Omgewings-programme.
Die praktiese ekspo is aan sowat tweehonderd Gr 4 en 5 leerders van Gansbaai Primêr en Gr 6 leerders van Laerskool Gansbaai aangebied. Die jongklomp het waardevolle kennis opgedoen.
Anina Lee van WCC sê die verlede het geleer dat spesifiek Gansbaai kinders ‘n goeie kennis van fynbos het en altyd gretig is om meer te leer. Die tema van vanjaar se Fynbos Ekspo was die Fynbos Ekonomiese Stelsel en die bewaring daarvan.
Enkele voorbeelde wat uitgelig kan word, is: die verstommende diversiteit van fynbos in hierdie area; voorbeelde van die vier hoofkategorieë van fynbos-spesies; illustrasies van fynbos wat van veldbrande elke vyftien tot twintig jaar afhanklik is om voedingstowwe in die grond terug te kry; die gevare van uitheemse plante en hoe om daarmee te werk te gaan; die gevare wat ondeursigtige ontwikkeling vir fynbos en landskappe inhou; die belangrikheid van fynbos vir die plaaslike ekonomie.
