Hoërskool Overberg probeer om in pas te bly met veranderende tye en daar is op gewysigde vakkeuses vir 2017 besluit, wat Gansbaai leerders ook sal raak.
‘n Nuwe vak, Landboutegnologie, wat relevant vir die area is, sal vanaf 2017 aangebied word.
Duits en Meganiese Tegnologie sal volgende jaar vir die laaste matriekklas aangebied word, waarna dit gestaak sal word.
Die skoolhoof, mnr. Eddie Labuschagne, sê vir Duits is dit ‘n baie lang pad aan Hoërskool Overberg wat ten einde loop. “So ver as wat ons kon vasstel, is Duits vanaf ongeveer 1950 aangebied en is as ‘n kernvak vir universiteitstoelating gesien.” Landboutegnologie sal saam met die meer teoretiese Landbouwetenskap deur leerders geneem kan word, met die fokus op die praktiese deel.
Twee onderwysers, wat onder andere by die uitfaserende vakke betrokke is, me. Sonica Louw (Duits) en mnr. Grant Murdoch (Meganiese Tegnologie), beskik oor jarelange ervaring.
Me. Louw is sedert 1976 aan die hoërskool as Duits-, Geskiedenis- en Afrikaanse onderwyseres verbonde.
Mnr. Murdoch is vanaf 2001 by Ovies en het Motorwerktuigkunde as vak infaseer.
Vir duidelikheid oor die nuwe vak, Landboutegnologie, sal mnr. Albert van Zyl, hoofspesialis van die vak Landbou in die Wes-Kaap, Donderdag, 29 September 2016 om 10:00 by die graad 9 klasse wees om hulle in te lig oor presies wat hulle van die nuwe vak kan verwag.
Ouers wat belangstel, is ook welkom om te kom luister.
