Grootste groep nóg by wynproe

Gansbaai Wynproegilde, die mees suidelike wynproegilde in die land, is agt jaar gelede op Dinsdag, 11 November 2008 deur  wyle  Helmie de Vries gestig.

Helmie het as voorsitter tot en met sy afsterwe 16 Julie 2014 gedien en Gansbaai Wynproegilde het gedurende sy termyn van krag tot krag gegroei.

‘n Rekordgetal gaste het die maandbyeenkoms op 23 September 2016 by die gewilde Great White House in Kleinbaai bygewoon.

Nie minder nie as vyftig wynliefhebbers het die aand onder voorsitterskap van Theuns Roodman bygewoon.

Saxenburg Wyne van Kuilsrivier was op die wynproelys en hul skakelbeampte, Lientjie Venter het die aanbieding behartig.

Lientjie se ma, Marie de Jager, woon in De Kelders en dit was vir ma en dogter ‘n besonder spesiale geleentheid.

Saxenburg se ontstaan dateer meer as twee dekades terug toe goewerneur Simon van der Stel die plaas aan ‘n Vryburger van Duitsland, Joachim Sax, toegeken het.  Sedertdien het dit ‘n familieplaas gebly, met die Bührer-familie steeds aan die stuur van sake en twee van die kinders, Fiona en Vincent Bührer, as bestuurders.

Lientjie se verwelkomingswyn was ‘n versnit van Chenin Blanc en gehoute Viognier met ‘n intense tropiese geur.

Die volgende wyne van Saxenburg se private versameling is aangebied, met die gaste se toekennings in hakies: Sauvignon Blanc 2016 (sterk silwer); Merlot 2011 (sterk silwer); Shiraz 2014 Shiraz (goud).

Nog wyne wat op die proe-tafel beskikbaar was, is ‘n versnit van Cabernet, Merlot en Shiraz, asook Saxenburg se Private Collections van Chardonnay, Pinotage en Cabernet Sauvignon.

Die Great White House se sjef, Chris Pead, het die gaste weer eens aan die praat gehad met sy spyskaart.

Die hoofgereg was geurige  Thai-hoender in komkommerbakkies gekomplimenteer met ‘n suurlemoenknoffel krulkoolslaai. Dit is opgevolg met Springbok in filobakkies met ‘n rooibos-appelkoos verrassing saam met geroosterde groente.  Die geleentheid is afgesluit met piesangkaramelpoeding en roomys.

Voorwaar ‘n smaaksensasie vir die fynproewer.

Navrae aangaande Gansbaai Wynproegilde kan aan Amanda de Vries gerig word by 028-388-0708 of 082-577-6920 of stuur ‘n e-pos aan haar by info@franskraalbandb.co.za

Lientjie Venter (regs) wat Saxenburg Wyne bekend gestel het, Theuns Roodman, voorsitter van die wynproegilde (links)  met  Lorraine de Klerk, gasvrou by Great White House en Marinda van der Walt  van die Gansbaai Courant, wat die dankie-sê geskenk oorhandig het.
Gansbaai_Courant_New