Dan en Wan hou skaapkopete

Die eet van skaapkoppe, 15 daarvan, het op Maandag, 10 Oktober 2016 hoogty in Franskraal gevier na afloop van die klub, Dan-en-Wan se 9-putjie gholfdag in Hermanus.

Die gasheer vir die skaapkopete was Abie Smith van Franskraal en, alhoewel almal nie vir ‘n skaapkop te vinde was nie, het die vrolike groep gesellig onder die ruie bome op Abie se erf gekuier.

Johan Hamilton, organiseerder van die klub, sê Dan-en-Wan beteken letterlik af en toe of nie af en toe nie - alles hang af van wat die groep afgetredenes wil of nie wil doen nie.

Die stigting van die groep, sowat dertien jaar gelede, se oorsprong is in Hermanus waar ‘n groep afgetredenes vanuit ‘n wye spektrum in  die sakelui besluit het hulle wil mekaar ondersteun met hul gholfspel.

Die aanvanklike bedoeling van die klub het uitgebrei en nou reël hulle gereeld verskillende uitstappies waarby hul vrouens ook betrek word, “aangesien dit ook belangrik is vir kameraadskap, gesellige samesyn en om mekaar beter te leer ken,” het Johan gesê.

Die groep het Johan genader om hulle te help om ‘n goeie atmosfeer te skep. Sy voorstel was die stigting van die Dan-en-Wan klub. Hulle wou met ‘n jaarlikse afvalpotjie begin om bymekaar te kom, maar met die uitstekende fasiliteite by Abie se huis in Franskraal, is daar op skaapkopetes besluit, wat vanjaar vir die tiende keer gereël is.

Die klub fokus ook op onderlinge kommunikasie, aangesien daar vier Duitsers, drie Engelse en een Switser in hul geledere is.

‘n Deel van die Dan-en-Wan klub se vyftien skaapkoppe wat vir die warm oond in die agtergrond wag om gebak te word.
Die interessante klub, Dan-en-Wan, se lede tydens hulle skaapkopete aan huis van Abie Smith in Franskraal. Voor sit die organiseerder,  Johan Hamilton (links) saam met die gasheer, Abie Smith, met die vrolike groep lede agter hulle.
Gansbaai_Courant_New