Jolyn Phillips, ‘n gebore Gansbaaier van Blompark, het haar debuutbundel, Tjieng Tjang Tjerries and other Stories, Vrydag, 30 September 2016 tydens ‘n prestige geleentheid in Gansbaai Primêr se skoolsaal bekendgestel.
‘n Helde ontvangs het in die skoolsaal op haar gewag waar sy vanaf 1995 ‘n leerder van die skool was.
Overstrandse Uitvoerende Burgemeester, Raadsheer Rudolph Smith het onder andere gesê: “Jy is ‘n absolute inspirasie oor wat alles met harde werk en toegewydheid bereik kan word. Deur jou voorbeeld het jy bewys dat alles moontlik is, indien jy in jouself glo.”
Tydens haar toespraak het Jolyn gesê Steve Jacobs, taalonderwyser, was vir haar ‘n mentor.
Jolyn se boek het wye reaksie onder bekende skrywers soos Antjie Krog, Meg van der Merwe en andere uitgelok. (Gansbaai Courant, Donderdag, 22 September 2016).
Die kortverhale handel oor die lief en leed van mense en veral vissers in Gansbaai en omgewing en aspekte soos hartseer, humor, dwelms, ontrouheid, armoede, maar ook sprankelende lewens-energie word aangeraak.
Jolyn se ouers, Jacobus en Jocelyn Phillips, woon steeds in Blompark, wat haar boekbekendstelling des te meer kosbaar vir haar gemaak het.
