Na 42 jaar, ‘n leeftyd, in diens van die Gansbaai Munisipaliteit het Zelda Fourie (eggenote van Flip Fourie wat onlangs ook na jare se diens by Gansbaai Marine met pensioen afgetree het) pensioenleeftyd bereik.
Haar laaste werksdag by die openbare biblioteek in Gansbaai was op 31 Oktober 2016.
Zelda was aanvanklik deur die destydse Poskantoor in Gansbaai as telefoniste aangestel voordat sy deur die destydse Munisipaliteit Gansbaai aangestel is as bibliotekaris.
Sedert 1999 beklee sy die pos van Biblioteek Assistent by die openbare biblioteek in Gansbaai. Haar diens was egter tydens ‘n swangerskap gedurende 1985/86 onderbreek. Die egpaar het drie kinders, Carmen, René en Flippie, wat almal onder ma se vlerk al diens gedoen het by die biblioteek.
Dit was sommer op vroeë ouderdom al duidelik dat hulle die werk wat hul ma doen baie geniet en dat hulle dit ook geniet het om saam met haar te werk.
Die bekwame en vriendelike Ronette Dreyer, ‘n ou bekende in die Gansbaai biblioteek, is aangestel om Zelda met ingang van 1 Desember 2016 op te volg.
Zelda is gelukkig nie dadelik totaal verlore vir die biblioteek nie, aangesien sy nog vir November 2016 op ‘n tydelike basis sal uithelp.
Namens die gemeenskap van Gansbaai en ook haar mede kollegas by die Munisipaliteit wil ons haar en haar familie hartlik bedank vir baie jare se goeie diens in die biblioteek en wil ons ook vir haar alle voorspoed vir die toekoms toewens.
Ons vertrou dat sy in hierdie nuwe fase van haar lewe geseënd sal wees met goeie gesondheid en dat sy meer tyd vir haarself, haar familie en vriende sal hê.
Ons sê totsiens maar nie vaarwel.
