‘n Nuwe en groot kopieermasjien wat onlangs aan Masakhane Primary School se hoof, Maxwell Mdini oorhandig is, het selfs die leerders wat kom inloer het, sprakeloos gehad.
Die kopieermasjien is deur Malcolm Bury van Stanford Rotariërsklub namens Jack Doyle van Engeland by die skool afgelewer.
“Hierdie kopieermasjien is ‘n verligting van ‘n groot nood by ons, veral met die oog op ons nuwe skool wat vroeg volgende jaar amptelik geopen sal word,” het Maxwell gesê.
Hierdie was maar een van vele groot projekte wat al deur Jack Doyle van Chester Le Street, Engeland van stapel gestuur is.
Steve en Margi Muller van Franskraal is jarelange vriende van die Doyle-egpaar, Jack en Anita, en Margi tree as Jack se “verteenwoordiger” in Gansbaai op.
Die Doyle-egpaar kom reeds oor ‘n baie lang tydperk jaarliks na Gansbaai.
Van dag een af was Jack intens vasgevang deur die nood wat in die dorp en omgewing heers en dit is veral Gansbaai Primêr, Silwerjare Dienssentrum, Oak Grove Nasorgsentrum en Masakhane Primary School wat hom na aan die hart lê.
Jack het begin deur gereeld in Engeland fondsinsamelingsprojekte te reël onder individue en organisasies. Op hierdie wyse is talle groot projekte al aangepak en afgehandel.
Vir kontrole doeleindes word finansiële oorbetalings en die beheer daarvan met Margi se hulp deur die Standford Rotariërsklub hanteer.
As gevolg van Anita se gesondheid was die Doyle-egpaar sowat twee jaar laas in Gansbaai, alhoewel hy steeds voortgegaan het met sy beplande projekte.
Anita se gesondheid het egter sodanig verbeter dat die egpaar in die nuwe jaar vir drie maande in Gansbaai kom kuier vanaf 6 Januarie.