Veteraankameras sover terug gedateer as 1938 - wát ‘n interessante belewenis vir enige fotograaf!
John McGregor se uitstalling van sy versameling van kameras in Gansbaai Toerisme se lokaal bestaan uit meer as 30 ou kameras, met elkeen sy stukkie interessante geskiedenis.
“Ek het net een doel voor oë met my versameling van ou kameras en die uitstallings wat daarmee gepaard gaan - bewaring vir die nageslag sodat hulle kan sien in watter mate die tegnologie gevorder het vanuit ‘n era wat jong mense nie meer vandag ken nie,” vertel John.
Enkele voorbeelde is die baie skaars Minolta 110 Zoom SLR; Leica 110 Wetzlar (Duitsland) van 1938, wat deur die Russe hervervaardig is onder die naam FED2 (1955) en later as die ZORCI (1955). Kameras wat in die sestiger jare gewild by die “fotograaf op straat” was, is die Asahi Pentax S3 en die Asahi Pentax S10.
Verskeie ou kameralense is ook in die uitstalling te sien. ‘n Besoek aan die uitstalling is beslis die moeite werd.
Enige iemand wat meer van die besondere oudhede te wete wil kom kan vir John McGregor by 060 735 8865 skakel – en nee, sy kameras is nie te koop nie.
