Overberg Kushengelklub baljaar onder Bellmanne

Die kushengelaars van Overberg Kushengelklub het behoorlik baljaar onder die bellmanne, pragtige visse.

Dit was die klub se eerste kushengelkompetisie vir die jaar wat Saterdag, 4 Februarie 2017, plaasgevind het. ‘n Groep van die “heldhaftige” hengelaars het die vorige aand sommer langs die see geslaap.

Die manne wat met die bellmanne gespog het, is: Dawie Toua (grootste vis, ‘n bellman van 2.86kg, asook die 2de swaarste sak; Arno van der Merwe (swaarste sak van 3.12kg, ook bellmanne).

Elba Tredoux van die klub verwys ook na hulle “nuwe klubhuis” – die lapa op Lada Germishuys se plaas, Uilenkraal. “Dit het vir groot opgewondenheid gesorg en lekker kuiers word vir die toekoms daar voorspel,” het Elba gesê.

Die suksesse van 2016 se hengelprestasies is terselfdertyd gevier. Die voorsitter, Frans Claassen, het tradisioneel weer met ‘n klompie pittighede oor “visstories” vorendag gekom. Interessanthede rakende visname vanuit die volksmond, het ook opgeduik: John Dory - Zeus Faber, vernoem na die Griekse God Zeus; Mosselkraker (Sparodon durbanensis) - Witviskop, Beenbek, Silwersteenbras en Stompkop; Galjoen (Coracinus capensis), met Coracinus wat “kraakbek” beteken en Capensis wat “van die Kaap” beteken. Die naam “Galjoen” kom van die Nederlandse word, “Galei” wat na die vis se vegtersinstink verwys.

2016 se Kampioene

Die 2016 trofeë-wenners (en kampioene) van Overberg Kushengelklub vir 2016 was: Eldo Marais (klubkampioen vir 2016); Eric Coetzee (reserwe kampioen vir 2016); Anthony Melly (grootste galjoen, 2.91kg); Oubaas Lesch (grootste steenbras, 5.4kg); Arno van der Merwe (grootste Kabeljou, 5.13kg); Eldo Marais (grootste mosselkraker, 7.42kg); Leibrandt van Niekerk (voorsitterstrofee); Eldo Marais (meeste massa, 22.22kg). Oubaas Lesch lê in die 3de posisie, met Anthony Melly 4de, Sihan Toua 5de en Stephen Ashlin 6de.

Arno van der Merwe, die Wenner van die Dag, tydens Februarie se kompetisie met sy Bellmanne wat hy gevang het.
Overberg Kushengelklub se 2016 trofee-wenners: Voor vlnr Stephen Ashlin en Eric Coetzee. Agter vlnr Anthony Melly, Sian Toua, Arno van der Merwe, Oubaas Lesch, Frans Claassen, Eldo Marais (Kampioen) en Leibrandt van Niekerk.
Die suksesvolle hengelaars van die dag tydens die kompetisie. Vlnr Gerrie van der Merwe, Arno van der Merwe, Johan van Romburgh, Sihan Toua, Eric Coetzee en Dawie Toua.
‘n Tevrede Eldo Marais (middel) ontvang die trofee as 2016 se Kampioen Hengelaar van Riaan Conradie (links), met Frans Claassen wat toekyk.
Die hengelaar met die grootste vis vir die dag was Dawie Toua, ook met ‘n Bellman wat hy gevang het.