Overberg weeg mooi visse in

Overberg Kushengelklub se manne moes eers ‘n week lank hard aan die verbeteringe van hul klubhuis werk voordat gehengel kon word.

Hulle het gelukkig genoeg krag oorgehad vir verlede Saterdag, 25 Februarie 2017 se klubkompetisie, aangesien pragtige steenbrasse, kabeljoue en bellmanne ingeweeg is.

Eldo Marais, Klubkampioen van 2016, het seker gemaak hy begin 2017 ook goed met die grootste vis, ‘n steenbras (5.22kg), wat hom ook die swaarste sak (5.22kg) laat inweeg het.

Oubaas Lesch, die klub se “veteraan” kushengelaar, se steenbras van 4.60kg was die tweede grootste vis van die dag.  Pieter Marais se steenbras van 4.26kg het die 3de plek aan hom besorg.

Elba Tredoux van Overstrand Kushengelklub vertel dat ‘n vrolike atmosfeer geheers het, met gesellige saamkuier om braaivleisvure gedurende die aand.

“Dit was ook ‘n spesiale dag vir Mynhard en Christa van Niekerk, wat hul 50ste huweliksherdenking gevier het,” vertel Elba.

Volgens haar is dit verblydend dat die klub in getalle groei en sterk kompetisie word vanjaar verwag.  Sy sê die nuwe klubhuis en die gesellige saamkuier daar, speel beslis ‘n positiewe rol onder die klublede.

Belangstellendes om aan te sluit kan vir Leibrandt van Niekerk by 028 384 1333 skakel.

Die groep hengelaars van Overberg Kushengelklub, wat eers ná ‘n week se harde werk aan hul nuwe klubhuis aan die kompetisie kon gaan deelneem. Van links Eugene Rheedeer, Pieter Marais, Oubaas Lesch, Eldo Marais, Johan van Romburgh en Dennis Jolliffe.
Die Klubkampioen van 2016, Eldo Marais, het sy jaar goed afgeskop met die grootste vis (steenbras, 5,22kg) en swaarste sak (5.22kg).
Oubaas Lesch met sy steenbras van 4.60kg waarmee hy die 2de plek ingepalm het.
GansbaaiCourantNew