Minister besoek skool

Die Minister van Onderwys, Debbie Schafer, se besoek aan Gansbaai Academia verlede Maandag (27 Februarie 2017) was ‘n vroeg-in-die-jaar hoogtepunt vir die skool.

Die minister is deur verskeie hooggeplaastes, parlementariërs, Overstrandse Raadslede en die Direkteur van Onderwys in die Overberg, Betram Loriston vergesel.

Die doel van die besoek was om gesprek te voer oor die verskeidenheid van uitdagings wat Gansbaai Academia in die gesig staar.

Die skoolhoof, mnr Tommy Wilson en sy personeel is gelukgewens met die puik prestasies wat tydens die 2016 matriekeksamens behaal is.

Mnr Loriston het dit onomwonde gestel dat, desondanks vele uitdagings wat die hoof gebied moet word, Gansbaai Academia een van sy beste skole in die Overberg is. “Dit gaan om goeie leierskap en kwaliteit onderrig,” het hy gesê. “Die hoof en sy personeel moet gelukgewens word en hulle verdien die hele Gansbaai, insluitend besighede, se volle ondersteuning.”

‘n Welkome aankondiging van vyf nuwe klaskamers wat teen 2019 of vroeër voltooi behoort te wees, is gemaak.

Met verwysing na die busdiensprobleme na en van Stanford, waaroor Gansbaai Courant onlangs berig het, het die minister haar teleurstelling daaroor uitgespreek. Sy het onderneem om haar volle aandag aan die onaanvaarbare situasie te skenk.

Die minister het ook onderneem om na aansoeke wat die skool vir twee addisionele onderwysposte ingestuur het om klasgroottes te verlaag, te kyk. Die gesprekvoerders tydens die besoek was dit eens dat, desondanks die kontekstuele faktore en vele uitdagings, Gansbaai Academia met van die beste hoërskole vergelyk kan word.

Die Minister van Onderwys is deur verskeie hooggeplaastes vergesel tydens haar positiewe besoek aan Gansbaai Academia. Voor vlnr rdl Riana de Coning, Masizole Mnqasela (Lid van die Parlement), Tommy Wilson (skoolhoof), Minister Debbie Schäfer, rdl Dudley Coetzee (Overstrandse Onder-burgemeester) en rdl Lindile Ntsabo. Agter vlnr rdl Archie Klaas (ODM Onderburgemeester), rdl Stephen Fourie (ODM), Betram Loriston (D-rekteur: Overberg Onderwys) en rdl Andrew Komanie.
GansbaaiCourantNew