Boothengelaars van die Birkenhead Boothengelklub was heel tevrede met hul vangste wat hulle Saterdag, 4 Maart, kant toe gebring het, ten spyte van die feit dat die dag se vangs oor die algemeen as swak beskou is.
Die swaarste vis wat gevang is, is ‘n geelbek van 1.7kg deur George Rowan.
Een van die klub se knap juniors, JP Uys, kon nie deelneem nie. Sy vriend, Hennie Groenewald het met die louere weggestap met die tweede swaarste vis, asook vir die swaarste sak.
Vyf bote het ingeskryf en al vyf het ingeweeg. Die aantal bemanning was 17, waarby een junior ingesluit was, en die hengelaars het 7 spesies ingeweeg.
Die totale aantal vis was 93, met 'n totale massa van 67.4kg, wat ‘n gemiddeld van 3.94kg per hengelaar beteken.
Die volledige uitslae is soos volg: swaarste vis 1.70kg, George Roman (geelbek); 2de swaarste vis 1.30kg, Hennie Groenewald (roman); swaarste sak (8.40kg), Hennie Groenewald (Jnr); 2de swaarste sak (8.30kg), Ben Uys; swaarste bootgemiddeld (8.12kg), Oupa van Ben Uys; 2de swaarste bootgemiddeld (7.20kg), Bella Me van Bev Swart.
Hierdie kompetisie was die klub se vierde boothengelkompetisie vir 2017 en die eerste drie voorlopers is: Bootkampioene - Oupa (29.45kg) van Ben Uys, Bella Me (13.38kg) van Bev Swart en Relêks 2 (8.30kg) van Jean Downing; Mans Visvangkampioene - Ben Uys (23.50kg), Danie Fourie (21.50kg) en Piet le Roux (13.90); Junior Visvang-kampioene - JP Uys (18.40kg) en Hennie Groe-newald (10.0kg).
Met die oor op die grond kon opmerkings soos, “wag maar, die jaar is nog lank”, gehoor word.
