Sommige van die atlete wat aan die Big2Town vasbytstap deelgeneem het, het Saterdagmiddag, 8 April hinke-pink by die prysuitdelingsfunksie in die Gansbaai Sportsaal opgedaag.
Die stappers het sowat 75km oor twee dae afgelê. Swaar reën, wind en modder het hulle veral Vrydag (7 April) gekniehalter.
Altesaam 11 spanne met 6 lede elk het deelgeneem. Deelnemers het so ver as Port Elizabeth, Breederivier en Laaiplek gekom.
Die jaarlikse byeenkoms tussen die onderskeie Magte het deelnemers gelok van Korrektiewe Dienste en die SAPD.
Die oudste deelnemer was ‘n vroulike lid van 67 jaar en die jongste deelnemer van Ladismith, was die 19-jarige Marcel Simpson. Marcel neem aan die wedloop deel vandat dit 5 jaar gelede die eerste keer in Gansbaai deur die Overstrand Sportklub aangebied is.
Die uitslae is soos volg: Senior Vroue – eerste: Disa Walkers 1; tweede: Disa Walkers 2. Gemengde Seniorspanne – eerste The Incredibles; tweede: Belhar.
Gemengde veterane – eerste: Gansbaai SAPD. Gemengde Meesters – eerste: Breederivier Korrektiewe Dienste. Mans Veterane – eerste: 6 Brothers; tweede – Disa Walkers. Senior Mans – eerste: Disa Walkers.
Pretstap
Die 8km pretstap wat Vrydagmiddag aangebied is, het 41 deelnemers gelok.
Overberg Sportklub is dankbaar vir almal se deelname en bydraes om van hierdie byeenkoms weer eens ‘n groot sukses te maak.