Die swangerskaptoets wys twee strepies. Die nuwe baba is op pad. Dit is die begin van die wonderlikste tyd van jou lewe. Of is dit…?
Swangerskap en kinders grootmaak is beslis nie altyd maanskyn en rose nie. Daar is verskillende vorms van poefdoeke om mee rekening te hou – van die spookdoek tot die rosyntjiedoek.
Daar is die borsvoedbrigade en die bottelbrigadiers wat probeer om hul sienings op jou af te dwing. En tussendeur alles sukkel jy met die nare newe-effekte van swangerskap: spatare, sooibrand, poedingbrein en ‘n seksdrang wat iewers tussen die spoegdoeke en steriliseerders verdwyn het.
Dit is nie kinderspeletjies om ‘n superma te wees nie, maar as jy die stryd aanpak gewapen met ‘n doeksak vol humor (en soms ‘n glas wyn) word dit die avontuur van ‘n leeftyd.
Die boek Superma (en ander mites), geskryf deur Chantelle de Wet is ‘n realistiese, eerlike en heerlik humoristiese blik op die uitdagings van ma wees – en ‘n viering van daardie klein, perfekte oomblikke wat ouer-skap die moeite werd maak.
Die skrywer is die ma van twee woelwaters, ‘n onderwyser, ‘n motiveringspreker en skrywer van toesprake, skoolhandboeke, kortverhale en blogs.
Sy glo as die blink kant nie bo is nie, vryf die kant wat bo is blink!
Helen Schoër, redakteur van Baba en Kleuter, som Superma (en ander mites) se outeur in kort op: “Chantelle is eerlik, intelligent, snaaks en vol oneerbiedige opinies oor ouerskap.”
Hierdie sagtebandboek wat deur LAPA Uitgewers versprei word, kan vandeesweek deur een van ons lesers gewen word deur die volgende vraag te antwoord:
Hoeveel restaurante adverteer Moedersdagetes in hierdie week se uitgawe van die Gansbaai Courant?
Sms die antwoord, jou naam en van na 082 561 8655 voor of op 15 Mei.
