Die bederfnaweek vir die dogters van Herberg Kinderhuis in Robertson, het die afgelope naweek in Gansbaai plaasgevind. Hulle het in Groeneweide Restaurant en Kwekery se gastehuis tuis gegaan.
Dit is ‘n jaarlikse projek wat deur Gansbaai NG-gemeente se Vrouediens gerëel word. Vanjaar se organiseerder was Babsie Greyling, bygestaan deur haar eggenoot, Kobus. Bykomende hulp gedurende die naweek is deur Marie de Kock, Floors en Marié Avenant, ‘n afgetrede predikantspaar, en die dogters se huismoeder, Bettie Thomas verleen. Vrywilligers vanuit die NG-gemeente het van die etes tuis voorberei.
‘n Ontspanne en genotvolle program is vir die dogters uitgewerk, wat onder ander die volgende insluit: geestelike versorging, handaktiwiteite, strandaktiwiteite, huiskerk, bywoning van die NGK se Erediens en veel meer pret en plesier en, natuurlik, heerlike etes.
Vanjaar se groep dogters, onder leiding van hul huismoeder, Bettie Thomas, was Amahle, Celeste, Elna, Ellouise, Jamasy, Janine, Keisiah, Lee-Ann, Lindi, Michelle, Nikita, Sonja en Tiffany.
Die naweek se aktiwiteite is afgesluit met die erediens in die Pretoriussaal deur dr Lisel Joubert. Tydens dié geleentheid het die dogters pragtige koorsang onder leiding van Floors en Marié Avenant gelewer. Daarna het roomys en ‘n smaaklike Sondagmiddagmaal op die dogters gewag, waarna hulle weer na Robertson teruggekeer het.
