Die nie-winsgewende gesondheids- en leefstyl organisasie ‘Be Free’, lei hierdie naweek ‘n uitstalling en werkswinkel by die Strandveldsaal in Baardskeerdersbos.
Belangstellendes kan die uitstalling tussen 11:00 en 15:00 besoek.
Die ekspo fokus op gesondheidsbewuswording en word deur plaaslike gesondheids-entoesiaste aangebied.
Hoewel mense deesdae langer leef, vermeerder die voorkoms van kanker, hartsiektes, tipe II diabetes en demensie teen ‘n ontstellende pas.
Bekostigbare gesondheidsorg moet dus versigtig bestuur en implementeer word.
Moderne medisyne sal altyd ‘n belangrike rol speel om lewens te red, nogtans het elke persoon die verantwoordelikheid om hulself en hul kinders te leer om vandag en in die toekoms in beheer van hul eie gesondheid te wees.
Mense moet volle verantwoordelikheid vir hul eie gesondheid aanvaar.
Die menslike liggaam beskik oor die unieke vermoë om homself te herstel, maar die mens moet dan die regte hulpmiddels verskaf en die geskikte omstandighede daarvoor skep.
‘n Opvoedkundige program oor “leefstylmedisyne” wat op die hele liggaam fokus, kan siektes voorkom, gesondheid verbeter en selfs ‘n ommekeer in siektetoestande tot gevolg hê.
Moderne leefwyses het tot gevolg dat kitskos die plek van gesonde, tuis voorbereide voedsel inneem. Verder word gesondheid bedreig deur ongesonde maniere waarop kossoorte voorberei word.
Saterdag se ekspo fokus op gesondheidsbewuswording en bestaan uit ‘n kort opvoedkundige program wat ontwerp is om praktiese vaardighede, tegnieke en idees voor te stel wat deelnemers in hul daaglikse lewens kan toepas.
Sodoende kan hulle hulself en hul gesinne op die weg na ‘n gesonder toekoms plaas.
Beslis ‘n geleentheid waarby ‘n ieder en elk baat sal vind.
