Ons dorp se minderbevoorregte bejaardes is genooi om deel uit te maak van 900 senior burgers wat ‘n gewilde opskop met bekende sangers, in Kaapstad gaan bywoon.
Tolbos se nuwe eienaars, Wayne en Carol Devitt daag alle besighede in Gansbaai uit om R1 000 te skenk vir hierdie grootse projek wat deur Helpende Hand in die Wes-Kaap geloods word.
Dit is die grootste uitstappie wat nog ooit deur Helpende Hand gereël is.
‘n Bus vol bejaardes vanuit Gansbaai sal die geleentheid kry om die Bakgat Country Opskop in die Kaap te gaan geniet. Plakkate van die opvoering is oral in die dorp te sien.
Anmarie Watney, die vorige eienaar van Tolbos het ook reeds R1 000 bygedra.
Daar is bitter min tyd oor om hierdie heerlike uitstappie vir minder bevoorregtes te befonds.
Bydraers kan Maretha Geldenhuys skakel by 082 805 3964 of ‘n epos stuur na fgbuild@mweb.co.za vir meer besonderhede.
Gun ons oumense ‘n Kaapse opskop - slegs jou bydrae gaan dit moontlik maak! Helpende Hand is ‘n organisasie wat hom beywer vir die voorkoming van armoede en opheffing van armes deur opleiding.
Enige bydrae sal ‘n verskil maak. Maretha en haar span van Helpende Hand voed en klee daagliks hulpbehoewende mense in Gansbaai.
MvdW