Verlede Saterdag se ontstuimige see, wat vroegoggend deur lede van die Birkenhead Boothengelklub aangedurf is, se tydjie op see is so teen 12:00 deur die wedstrydsekretaris, Jean Downing, kortgeknip: “Nee-wat manne, vergeet maar van die gewone lyne op en inweegtyd en kom terug, die see raak nou te rof!”
Ondanks die verkorte tyd, was die vangste nie te swak nie.
Net 3 van die 5 bote wat ingeskryf het, het ingeweeg. Die bemanning het 14 getel, waarvan 1 ‘n junior was. 4 spesies is ingeweeg, waarvan die belangrikste silwervis was. Die totale aantal vis was 56, met 'n totale massa van 43.85kg, wat ‘n gemiddeld van 3.13kg per hengelaar beteken.
Die volledige uitslae is soos volg: swaarste vis (silwervis, 1.25kg), Bertus Prins; 2de swaarste vis (silwervis, 1.15kg), Hennie Groenewald (junior); swaarste sak (6.95kg), Danie Fourie; 2de swaarste sak (6.35kg), Jean Downing; swaarste bootgemiddeld (5.64kg), Relêks van Jean Downing; 2de swaarste bootgemiddeld (5.16kg), Oupa van Ben Uys; Junior swaarste sak (4.75kg), Hennie Groenewald.
Hierdie kompetisie was die 7de boothengelkompetisie vir 2017 en die eerste drie voorlopers in die onderskeie kategorieë is: Bootkampioene - Oupa (34.05kg) van Ben Uys, Relêks (21.86kg) van Jean Downing en Bella Me (16.28kg) van Bev Swart; Mans Visvangkampioene - Danie Fourie (40.80kg), Ben Uys (35.45kg) en Jean Downing (27.30kg); Junior Visvangkampioene - Hennie Groenewald (29.7kg) en JP Uys (17.0kg).
