Pinksterdienste word jaarliks deur Gansbaai NG-gemeente met ‘n spesifieke tema vir die week se dienste aangebied.
Vanjaar se tema, “Waarom gaan ons kerk toe?”, is vanjaar vanaf Sondag, 28 Mei tot Vrydag, 2 Junie 2017 onder die soeklig geplaas.
Maar waaroor gaan pinkster en wat is pinkster?
Ds Dirk van Dyk het Sondag, 28 Mei 2017 lig op hierdie vraag gewerp en het Handelinge 2:1-4 en 1:8 as basis gebruik.
“Kom ons begin by die woord pinkster en die oorsprong daarvan soos ons in vers 1 gelees het, “toe die dag van die Pinksterfees aangebreek het..,” het hy gesê. “Die woord pinkster hou dus verband met die pinksterfees…..wat was dit?”
Die Jode het verskillende feeste gehad waartydens hulle belangrike gebeurtenisse herdenk het.
So was daar paasfees, waar hulle die uittog uit Egipte herdenk het en die loofhuttefees waar hulle hul oorlewing in die woestyn herdenk het.
Nog ‘n fees was pinksterfees waar hulle die Here gedank het as die gewer van reën, graan op vrugbare lande en brood om te kan eet.
Op hierdie dag het hulle twee brode na die tempel gebring om die Here te dank dat Hy dit alles moontlik gemaak het.
Hierdie dag is soos volg uitgewerk: “Dit was die dag nà die 7de sabbat, of dan die 7de Saterdag, dit wil sê 49 dae plus 1 dag, wat die 50ste dag nà paasfees was.” Die Griekse naam vir die fees is “pentekoste” wat die 50ste dag beteken, waarvandaan die woord pinkster kom. Die woord pinkster hou dus verband met pinksterfees wat op die 50ste dag nà paasfees plaasgevind het.
In die Nuwe Testament het daar op hierdie 50ste dag iets baie buitengewoon gebeur: daar was skielik uit die hemel ‘n geluid soos diè van ‘n geweldige stormwind en daar was ook iets soos vuur wat soos tonge verdeel het en op elkeen teenwoordig gekom het.
Wind en vuur in die Bybel hou verband met die teenwoordigheid van God - die Here was hier besig - en almal is met die Heilige Gees vervul en het in ander tale gepraat.
In sy boodskap daarna het die apostel Petrus verduidelik dat hulle nie dronk was nie. Die mense het net met die Here se hulp begin getuig van die groot dinge wat God deur Jesus gedoen het - die belofte van Jesus voor sy hemelvaart het dus nou waar geword, naamlik dat Hy weggaan, maar sy volgelinge nie alleen sou agterlaat nie.
“Met pinksterfeeste dank ons dus eintlik die Here ook vir die ontstaan van die kerk - waarvan ons deel is - die dag wanneer ons die Here dank vir Sy Gees wat ook vir ons help om Hom te dien en van Jesus te getuig,” het ds van Dyk gesê. “Sonder die Heilige Gees kan geen gelowige en geen kerk bestaan nie.”
Wanneer ons dus aan pinkster dink, hou dit verband met die uitstorting van die Heilige Gees op die Pinksterdag wat ‘n fees van die Jode was waarop hulle die Here gedank het vir die seën van die graanoes. “Vandag dank ons die Here ook vir elke dag se seëninge, maar veral vir die uitstorting van die Heilige Gees op daardie dag.”
Na afloop van die laaste diens (Vrydagaand), het die NG-Kerkkoor onder leiding van Aletta Löchner en met begeleiding deur Annelene Reinke, die week met die sing van “Hoe lieflik is U woninge” in die kerkgebou afgesluit.
In die saal het Laerskool Gansbaai se grondslagfase koor, graad 1 tot 3, onder leiding van Alana Louw verskeie kinderliedere onder groot toejuiging gesing. Marlete Longland het as dirigent opgetree, met Susan Cilliers agter die klavier vir begeleiding.
Daarna kon gelowiges ontspan en saam die gebruiklike Pinkstermaal geniet, met ‘n verskeidenheid van soppe en tuisgebakte brode wat deur die vroue voorberei en voorgesit is om die koue 'n bietjie te verdryf.
