“Atlete vir Christus 2017” het onlangs vanaf die Universiteit van Stellenbosch na Pearly Beach NG-gemeente gedraf om hul evangelie-boodskap daar uit te bring.
Die groep, onder leiding van hul “toerpa”, ds Frankie Gerber, ‘n leraar van Ceres-vallei, is ‘n diverse groep vrywillige studente. Hulle bestaan uit 10 atlete, ‘n sang-groep van 10 lede en 3 werkers. Dit is ‘n tradisieryke aksie wat al vir meer as 40 jaar tydens die Junie/Julie vakansies in verskeie dorpe optree om fondse vir die bediening aan gevangenes in te samel.
“Hierdie groep vrywillige studente is ware ambassadeurs vir die Koninkryk van Christus,” het ds Gerber gesê. “Hulle hardloop, sing, gesels, getuig en leef Jesus Christus!”
Ds Gerber is self ‘n oud-atleet wat in 1977 deel was van “Atlete vir Christus” se toer- en drafgeselskap tussen Stellenbosch en Ladysmith (KwaZulu-Natal).
Tydens die byeenkoms in Pearly Beach, het drie almamaters van die Universiteit van Stellenbosch se Teologiese Fakulteit, wat in 1981 saam afstudeer het, mekaar weer ontmoet vir ‘n gesellige saamkuier. Hulle is ds Frankie Gerber, toerleier van die besoekers, emeritus predikant van Pearly Beach, ds Hennie Basson en ds Dirk van Dyk van Gansbaai NG-gemeente.
Die jaarlikse doelwit van die groepe is om minstens R50 000 in te samel vir die evangelisasiewerk wat Bybel-media Suid-Afrika in Suid-Afrikaanse gevangenisse doen.
