Tannie Joey Nell het Saterdag haar 90ste verjaarsdag gevier. Sy woon sedert Februarie 2017 in Gansbaai. Sy het 3 kinders (Theo, Lynn en Leon), 5 kleinkinders en 4 agterkleinseuns.
Tannie Joey is in 1927 gebore. Sy het grootgeword in Magaliesburg omgewing op die plase Seekoeihoek en Sandfontein. Sy vertel graag staaltjies oor haar gelukkige kinderjare; kaalvoet loop, enige “tricks” om nie skoene skool toe te dra nie wat dan onvermydelik uitgeloop het op ‘n pak slae; hulle lewe met kerse en afstap na die rivier om water te gaan haal.
In 1946 is sy getroud met oom Jan Nell van Krugersdorp. Tannie Joey en oom Jan se pad het wyd gedraai in ‘n huwelik van amper 50 jaar.
Hulle is as pasgetroudes na Nkana in die destydse Noord Rhodesie waar oom Jan by die myn gewerk het. Hul oudste seun Theo is daar gebore.
Later is hulle na Mufulira waar oom Jan op die Koperbelt gewerk het. Lynn en Leon, haar ander twee kinders is daar gebore.
Hier het haar vrees vir donderweer en wind ontstaan toe ‘n groot boom hul huis te pletter geval het en sy net betyds met die twee klein kindertjies buitentoe kon hardloop.
Sy het altyd met deernis vertel hoe die mense hulle kom help het om gou weer in ‘n nuwe mynhuis te kon tuisraak.
Oom Jan was ook destyds betrokke by Operation Noah in Kariba waar hulle gestrande diere van die eiland gaan red het.
Die Nell familie is in 1963 terug na Suid-Afrika waar Tannie Joey vir 20 jaar, tot en met haar aftrede, as bestuurderes van Edgars gewerk het.
Na hul aftrede het hul pad in Durban gaan draai waar oom Jan in Februarie 1996 skielik oorlede is.
In 2004 het sy saam met haar dogter en skoonseun, Lynn en Japie, van Randfontein na Somerset-Wes verhuis.
Met die egpaar se aftrede het die mooie Overberg kusdorpie hulle harte gesteel en met hul verhuising na Kleinbaai in Februarie vanjaar het tannie Joey saamgekom en woon sedertdien in Huis Breda.
Lynn en Japie se innige dank gaan aan almal wat bygedra het om hierdie spesiale vrou se verjaarsdag ekstra spesiaal te maak.
Bygedra
