Die wenner van die Hyundai Grand i10 1.2 wat onlangs as prys aangebied is vir Gansbaai Superspargroep se kliënte, het al die pad van Johannesburg gevlieg om verlede Saterdag hierdie groot prys in ontvangs te kom neem.
Suretha le Grange en haar man besit ‘n vakansiehuis in De Kelders en vandaar die inskrywing by Gansbaai Superspar wat aan haar ‘n splinternuwe motortjie besorg het.
Suretha, die ma van 4 kinders en ‘n oud-Kapenaar is ‘n uitgetrede beroepsvrou en woon saam met haar man in Johannesburg.
Die motor moes sy staal alreeds met die eerste rit bewys, deurdat Suretha dadelik die pad teruggeneem het Gauteng toe.
“Ek is baie opgewonde oor hierdie groot prys en het spesiaal van Johannesburg af gevlieg en gaan direk daarheen terugry met my blinknuwe motor,” het ‘n opgewonde Suretha gesê.
“Ek slaap gelukkig twee plekke oor en kan dus rustig terugry.”
Suretha was een van vyf finaliste in Gansbaai Superspar-groep se motorkompetisie.
De Wet van Niekerk, mede-eienaar van Gansbaai Superspar, het gesorg vir nie-alkoholiese sjampanje en die kurkprop is onder luide toejuiging van personeellede laat klap, waarna die motorsleutels aan Suretha oorhandig is.
Die kompetisie is geloods deur die volgende groep winkels wat aan dieselfde groep behoort: Gansbaai Superspar, Bredasdorp Superspar, Kleinmond Superspar, Gateway Superspar in Hermanus en Eastcliff Kwikspar.
