Een keer ‘n week kom ‘n groep vlytige hekelentoesiaste by Hot Coffee in die Proteasentrum byeen. Dan word daar ‘hekel’ gepraat, wenke uitgeruil en die vrouens leer allerlei tegnieke by mekaar aan.
Rita Delport is een van hierdie vroue. Sy is ook ‘n VLV-lid wat werk aan dié organisasie se uitreikprojek vir 2017, nl vroetelkombersies.
Rita het Lynn Burger onlangs tydens een van die byeenkomste by dié koffiewinkel ontmoet en toe sy hoor Lynn se mammie, tannie Joey Nell, ly aan Altzheimers en dat sy eersdaags haar 90ste verjaardag sou vier, het sy daar en dan aangebied om vir haar ‘n vroetelkombersie te maak.
“Dit was ‘n belofte met deernis gemaak wat nagekom móés word” sê Rita. “Ek moes maar my naaimasjien afstof en skouer aan die wiel sit.
Rita is vroeër die maand na tannie Joey se 90ste verjaardagviering genooi en sê: “Tannie Joey is ‘n pragtige tannie. Die verhouding tussen ma en dogter skyn helder.
Dit was ‘n voorreg om die Burger-egpaar en Tannie Joey te ontmoet en die oggend saam te kon deurbring.”
Eva Bucher en Daleen Jooste het die partytjietafel met sorg gedek en tannie Joey ‘mooi gemaak’.
Judith Coetzee het gesorg vir die prentjiemooi koek en Tannie Joey se verjaardag-viering by Huis Breda, waar sy sedert Februarie vanjaar woon, was ‘n besondere geleentheid.
