Soos wat VLV-takke jaarliks landwyd ‘n jaartema het, so belê elke tak ook tyd en liefde aan ‘n vrywillige en gratis gemeenskapsprojek.
Die 2017 jaartema is ‘Aanpasbare Vroue’. Die plaaslike takvoorsitster, Rienie Ludick het na aanleiding van haar niggie se hart- en handewerk, besluit om vroetelkombersies vir Alzheimer pasiënte as Gansbaai-tak se jaarprojek te registreer.
Haar niggie wat in Vredenburg woon, maak kleurvolle skootkombersies en werk allerlei veilige vroetelgoete daaraan vas.
So het vroetelkombersies ‘n gewilde geskenk geword om Alzheimer en Parkinson’s pasiënte se hande besig te hou, terwyl dit ter selfdertyd goed is vir breinstimulering.
Dit is ‘n duur projek, maar soos Rienie sê: “Dit is ‘n liefdestaak en daar is ‘n groot behoefte hieraan vir die pasiënte.”
Die kombersies sal later vanjaar aan pasiënte van die Elder Care Place in Hermanus geskenk word.
Dit word egter ook geskenk soos wat ‘n geleentheid voorkom en so word die kombersies dwarsdeur die jaar volgens behoefte geskenk.
“Ons wil graag uitreik na Gansbaai se aanpasbare vroue om met ons hande te neem en sodoende weer hiermee uit te reik na ons gemeenskap. Liefde, omgee en uitreik het nie 'n prys nie, maar bêre ewige skatte in harte.
Sekere dinge verander nooit met tyd. Tyd herhaal homself net – so sal ons uitreik na ander altyd relevant bly,” gesels die VLV vrou met die groot hart.
Indien jy meer wil uitvind skakel gerus: Rienie Ludick (028 384 1170-huis) of (081 443 8248-sel).
