Dit was ‘n gesellige, maar reënerige “Sunset Walk” vanaf Gansbaai se ou hawe na die nuwe hawe op 29 Augustus 2017.
Hierdie suksesvolle staptogte word vir liefdadigheidsorganisasies deur Gansbaai Toerisme gereël en aangebied.
Ondanks reënerige weer, ook met die vorige stap, het dit so gewild geraak dat dit nou ‘n instelling geword het.
Iemand het met die tong in die kies gesê Glenda Kitley, Bestuurder: Gansbaai Toerisme, moet dieselfde staptogte in drooggeteisterde gebiede aanbied – dit reën elke keer.
Augustusmaand se deelname het warm vis & skyfies van Fanie en Salomé Barnard van Fish Lady ingesluit, asook ‘n glas wyn van Lomond Wynlandgoed.
Ongelukkig kon dit nie realiseer om die vis & skyfies op een van die vistreilers te nuttig nie, maar nie dìt, òf die reën, kon ‘n demper op die gesellige laatmiddag sonsondergangstappie plaas nie.
