“Eva, soveel van jou straal deur jou oë, die venster van jou hart - vat aan ander se harte en vra God om jou daarvoor oop te maak...”, het Susan van Heerden gesê.
Susan het as gasspreker tydens ‘n damesoggendtee met die tema, “Die hartklop van Eva”, op Saterdag, 2 September 2017 in die AGS saal opgetree.
Die prestige funksie in ‘n besondere pragversierde saal, is deur past Beryll Coetzer en haar helpers gereël.
Een van Susan se kosbare opmerkings was: “God het vir Eva liefde, posisie en waarde gegee, wat sy in die paradys verruil het vir bang- en skuldgevoelens, maar sy is deur Jesus Christus herstel om weer spesiaal en anders te kon wees – om lewe te skenk, lewe te spreek, lewe te omarm en lewe te deel.”
Susan het met ‘n leë, goue portretraam na een van die dames by ‘n tafel gestap en haar gevra om met haar gesig agter die raam te staan. “Dit is hoe God jou sien – deur ‘n goue raam,” het Susan gesê.
“Wat is jou naam?”
Susan vertel dat sy haar ore nie kon glo toe die dame antwoord:
“My naam is Eva.” – die tema van Susan se boodskap aan die dames!
“Ek vertrou dat elke dame vandag met ‘n ‘wow!’ in haar huis toe gegaan het, maar my persoonlike ‘wow!’ vir die dag was toe die dame in die goue raam vir my sê haar naam is Eva!”
