39 rommelrowers het Saterdag deel uitgemaak van Internasionale Kus Opruimdag.
Vanjaar het die groep wat onder die vaandel van Gansbaai Toerisme gewerk het, besluit om op die dorp se strate te fokus.
Die groep van 39 vrywilligers is deur Doulene Els van Gansbaai Toerisme gewerf vanuit die geledere van White Shark Projects Volunteers, Cape United Project Soccer Team, La Pentola in Hermanus, asook 3 plaaslike inwoners.
Hulle het in kleiner groepe deur die dorp beweeg en elke groep het ‘n “rekordhouer” aangewys wat elke stukkie rommel aangeteken het wat opgetel is.
Binne 2 ure en ‘n paar straatblokke verder, is 9 054 rommelstukke geoes.
Die groep se statistieke het soos volg gelees: 3 569 sigaretstompies, 438 eetgerei-artikels, 422 verskillende bottels en koeldrankblikkies en baie onhigiënies - 12 kondome en veel meer.
Altesaam 14 huishoudelike toerustingitems soos wasmasjiene, rekenaars en televisiestelle is ook aangeteken. Gansbaai Munisipaliteit het, soos altyd, hulle kant gebring en dié items gaan oplaai.
19 sakke met herwinbare items en 2 swart vullissakke met nie-herwinbare items is opgetel – met ‘n gesamentlike massa van 61kg. Dit sluit nie die huishoudelike items in wat deur die munisipaliteit weggery is nie.
Doulene het die besonderhede, beskrywings en getalle, op die Ocean Conservancy se webtuiste aangeteken.
