Nisboere: Hoe ‘n bietjie inspirasie en ‘n klein stukkie grond ‘n enorme verskil kan maak. Die landboureus Laeveld Agrochem se reeks Nisboere is pas op VIA DStv Kanaal 147 begin uitsaai.
“Die oorhoofse doelstellings van die reeks is die depolitisering van landbou en die stimulering van werkskepping,” sê Corné Liebenberg, bemarkingsdirekteur.
“En die boodskap wat ons wil oordra, is dat enigiemand met ‘n bietjie inspirasie, baie passie en ‘n klein nis, ‘n betekenisvolle en volhoubare bestaan kan skep.”
In die loop van 15 episodes besoek aanbieders Anrich Herbst, Chris de Clerq en Simonia Magardie klein en ongewone boerderye regoor die land en bied praktiese advies aan kykers wat moontlik self daarin belangstel om ‘n kleinskaalse boerdery op die been te bring.
Die boerderye wat tydens die eerste reeks besoek word, dek alles van eksotiese sampioene, diskusvisse en alpakkas tot truffels, perlemoen en laventel.
Magardie was nie net beïndruk met die diversiteit wat die span ervaar het nie. “Wat werklik inspirerend was, was die hoop en inspirasie wat uit elke boerdery spruit. Baie keer is so 'n boerdery uit ‘n posisie van wanhoop gebore, maar met toewyding en innovasie tot ‘n sukses omskep”, sê sy.
Hoewel meeste van die eerste reeks reeds se 45 verskillende tipes boerderye reeds gevind is, kan enige Suid-Afrikaner met ‘n nis- of ongewone tipe boerdery, wat graag op Nisboere wil verskyn, hul storie en besonderhede indien op die “Wees op Nisboere”-bladsy van die webwerf.
