Wyd oop

Wyd oop

Ons is mos eintlik ons eie grootste vyand. Ons soek baie keer ander mense om te blameer dat ons nie groei of nuwe dinge aanpak nie, maar eintlik plaas ons self hindernisse op die pad. Baie subtiel en elkeen s’n lyk anders. In 2 Korinthiers probeer Paulus die moeilike verhouding tussen hom en die gemeente in Korinte hanteer. Hulle bevraagteken sy apostoliese gesag omdat hy nie net sê wat hulle wil hoor nie. Hy push hulle om anders te dink en te leef.

Deurdat hulle hulle “toemaak” vir Paulus se woorde plaas hulle die blaam op hom. Hy skryf egter in 6: 12 “Julle word nie deur ons ingeperk nie, maar julle word deur julleself in julle eie binneste ingeperk……Stel julleself ook wyd oop vir ons.”

Paulus besef dat dit die mense van Korinte se ingesteldheid is wat gaan maak of hulle luister of nie en hy nooi hulle uit om hulle binneste oop te stel. Miskien sluit hulle dit toe want hulle is bang dat dit wat hulle hoor gaan beteken dat hulle anders moet dink en nuut weer moet besin. Ons almal ken daai gevoel. Bly maar by die bekende.

Die Direkte Vertaling van Psalm 4 bring God ook hier in die prentjie: “In die noute het U vir my ruimte gemaak.” (Psalm 4:2). Miskien kan God deur sy Gees ook ons binneste oper en wyer maak.