Hildegard von Bingen het dit so mooi uitgedruk dat ons sonde ons uitdroog. In haar wêreldbeeld is die skepping gevul met die groen groeikrag van God (viridatis) wat alles laat groei en in mense vrugte van liefde voortbring. Sonde is droogheid, maar skryf sy tereg, is belydenis trane. Trane wat lewe gee. Alan Jones in sy boek “Soul making. The desert way of spirituality” skryf: “Tears are agents of resurrection and transformation.” Dat God ons juis uithaal en nuutmaak in ons diepste hulpeloosheid. Dit is vreemde nuus in ‘n samelewing wat ons laat verstaan dat ons juis ons weerloosheid moet wegsteek. Dit is die goeie nuus van Jesus wat ook medelye het vir ons swakheid (Hebr 4:15)
