Dr Lisel Joubert, ‘n plaaslike teoloog, wat in 2013 met die Desmond Tutu-Gerrit Brandprys vir debuutwerk bekroon is, het Donderdag, 10 November 2016, die laaste een van haar nuwe reeks boeke vrygestel.
Die boek, Kleurmeditasies vir Kerstyd (Geloofsgedagtes), is tydens ‘n geselligheid by Gansbaai Book Exchange van Nicolette Bosch bekend gestel.
Lisel het in 2016 aan die reeks van vier inkleurmeditasieboeke begin werk.
Soos die res van die reeks, is die boek gevul met handgetekende gebedsprente deur Nico Simpson van Bybelmedia.
Die vorige drie uitgawes in die reeks is Kleurmeditasies vir Lydenstyd en Pase (Februarie 2016), Kleurmeditasies vir Pinkster (Mei 2016) en Kleurmeditasies vir Koningkrykstyd (Augustus 2016).
“Ek glo dat hierdie reeks inkleurmeditasieboeke met vrug deur die jaar gebruik kan word,” het Lisel gesê. “Die Kersfees weergawe wat nou verskyn het, kan die gebruiker van die boek by die verlange en viering van Advent en Jesus se vleeswording laat stilstaan.”
Elke boek bestaan uit negentig meditasies, waartydens lesers stiltyd kan deurbring. “Sodoende word die hele liggaam by die stilwordmoment van elke dag betrek.”
In 2015 het Lisel nog ‘n boek die lig laat sien: God van die Woestyn - ‘n ruimte van ontmoeting, verrassing en hoop, waarin daar nuut na die verhaal van Hagar gekyk word.
Lisel is een van Gansbaai NG-gemeente se voltydse leeraars.
Die titel van haar eerste, bekroonde boek was Ontmoeting met die Heiliges - Verhale van hoe mense hulle geloof geleef het.
