Goue Hande Bederf rolstoelbrigade

Wanneer die wyse gryses van Herberg-aan-See op hul jaarlikse uitstappie na die uitkykpunt by die hawe gaan, is die strate in daardie omgewing in rep en roer.

Aangesien die senior burgers van hul eie wiele en kieries gebruik maak om tot daar te kom, vergesel die munisipale verkeersafdeling die groep met flikkerende blou ligte.  

Heelparty vrywillige rolstoelstoters van Goue Hande sien om na die bejaardes en veelkleurige ballonne word uitgedeel om die prosessie op te vrolik.

By die uitkykpunt word die dors geles met koeldrank, terwyl die rolstoel- en kieriebrigade die mooi uitsig geniet.

Terug by die tehuis, word almal op vrugteslaai en roomys getrakteer, terwyl hulle in ‘n feestelike piekniekatmosfeer die vrolike klanke van Gansbaai Primêr (Blompark) se Marimba-orkes  kon geniet.

De Kleine Gansies se kleuters het die oupas en oumas terug verwelkom by Herberg-aan-See deur liedjies te sing en prentjies wat hulle spesiaal geteken het, uit te deel. Geselsies tussen jonk en oud het met heelwat drukkies gepaard gegaan.

Ons dorp se wyse gryses het egter betyds hul wiele ingespan om hul jaarlikse rolstoel- en kierie-uitstappie in pragtige weerstoestande te geniet.
Vrolike stappers van Herberg-aan-See – Frieda Prinsloo en Gina Louw.
Bult-af oppad terug na hul tuiste waar ‘n fees van bedrywighede en bederf op hulle gewag het.
Hettie Cronjé en Rhona Smit (voor) het vrolike hoede opgehad om hulle teen die son te beskut.
Die uitkykpunt oor die hawe bly maar ‘n besondere prentjie.  Nellie Matthee en Winnie Steenkamp se Goue Hande hulpspan sorg dat hulle die geleentheid ten volle kan benut.
Die voorreg van oudword is dat jy kan terugsit en geniet wat aangebied word.  Linda Malan, Corrie Wessels en Marie Steyn het deel uitgemaak van Herberg-aan-See se  rolstoelbrigade.
Granny Reuvers, Emma Booysen en Sophie Andrews het die buitelug uitstappie terdeë geniet.
GansbaaiCourantNew